تغطية اليوم الشعبي..

[المركز الصيفي الأول]

بسم اله الرحمن الرحيم
السلام عليكم ورحمة الله وبركاته.

يوم الاربعاء 7-8-1433هـ اقيمت فعاليات اليوم الشعبي ونفذ فيه العديد من الانشطة مسرحية ومشاركات الطالبات المتنوعة ايضا مشاركات عن بر الوالدين..
وازداد اليوم بهجة عندما شارك الجميع طالبات ومشرفات بزيهم الشعبي ..

شكر خاص لطالبة مشاعل البحيري على
مشاركتها المتميزة بأطباق شعبية رائعة..

مسابقة افضل زي شعبي
حازت على الجائزة الطالبة: نجود القويفلي.

مسرحية أم ذياب

الكاتبة: العنود محمد

الشخصيات
ام ذياب بناتها وضحى وعذبة
زوينة بنتها ميثاء
المشهد الأول
ام ذياب جالسة مع بنتها وعزوة تصلح القهوة على النار
أم ذياب تقول لبنتها: يابنتي الحياة صعيبة لزوم تكونين شجاعة لجل تواجهين الحياة لا تقطعين صلتك بربك فرضك لا تخلينه ولا تأخرينه عن وقته ورمضان تصومينه والمحتاج لا تردينه
وضحى: ابشري يمه بكون مثلك واسوي سواتك بكرم الضيفان واطعم المحتاج واكون خير عون لك
عزوة تقوم تقهويهم

تستمر ام ذياب وبنتها بالسوالف..
زوينه تخيط وهي كبيرة بالسن وبالكاد تشوف تنادي ميثاء تبيها تساعدها
زوينه: ياميثاء
ميثاء: نعم يمه
زوينه : ناوليني الخيط والابرة
ميثاء: لا يمه بروح اقضي وقتي مع عذبة
زوينة: الله يصلحك هاتي الابرة وروحي
ميثاء: يووووووه ياكثر طلباتك يالعجوز ماهو لزوم تخيطين
زوينه: ابي لك الزين يابنتي وتلبسين مثل باقي البنات
ميثاء: ايه بروح بخاطرك..

زوينه قعدت تدعي لبنتها ان الله يصلحها ويفتح على قلبها ويهديها لدرب الفلاح..
تقوم زوينه تعتريها الآم الكبر وتقدم السن وتذهب تبحث عن الابرة والخيط في الصندوق ولكن ضعف النظر منعها من الحصول عليها وجلست عنده تدعو الله ان يفرج لها ضيقتها

المشهد الثاني
تقوم وضحى وتدور على النسوان وتساعد المحتاج وتمر على بيت زوينه وتستأذن منها وتدخل عندها
زوينه تنادي بنتها من اجل تقهوي الضيف ولكن بنتها لاهيه باللعب
وضحى: ماهو لزوم القهوه انا جيت لجل اشوف في ايش اقدر اساعدك
زوينه: ياسعد امك فيك ربتك وتحصد مازرعت ياليت ميثاء مثلك
وضحى: هذا واجبي ياخاله وتكفيني دعوه منك
زوينه: شوفي يابنتي بالصندوق الخيط والابره ماوجدتهم..
تبحث وضحى في الصندوق وتطلع الخيط والابرة
وضحى: هااا ياخاله هذه الخيط والابرة ::: وتقعد تنظمهم لها
زوينة: بارك الله فيك ياوضحى الله يوفقك ويسعدك
وضحى: تامرين على حاجه ياخالة
زوينة: سلامتك يابنتي ديري بالك على حالك وسلميلي على ام ذياب..
خلصت خياطة الأم وتجي بنتها مسرعه وتدخل عليها بدون سلام
وتأخذ الثوب اللي بيدها وتلبسه وتخرج لعزوه توريها الثوب الجديد
وبعد فترة ترجع ميثاء
وتسألها أمها
الأم: يابنتي عجبك الثوب
البنت: ايه يمه وجاز لعذبة وبتقول لامها تصلح لها واحد مثله..

المشهد الثالث
تروح عذبة تبكي لأمها
عذبة: يمه ميثاء عليها ثوب جديد وكل بنات الفريق يمدحون الثوب واريد تصلحين لي واحد مثله
ام ذياب: يابنتي مو كل شي تشوفينه تريدين مثله
عذبه: بس انا اريد مثلها ثوب جديد وايش ناقصه انا عنها
ام ذياب: مالك الا اللي يرضيكي بسوي لك واحد احسن منه
افتحي الصندوق هاتي القماش الجديد والابرة والخيط والمقص
البنت: ابشري يمه
تروح عذبة لصندوق وتجيب الطلبات لامها وتقول سمي يمه هذا اللي طلبتي
الأم: تعالي هنا اشوف القياس عليك
وتقعد الأم تخيط الثوب لبنتها
# طبعا البنت راحت تقضي وقتها عند الشيخه تتعلم القرءان
لما رجعت لقت الثوب جاهز
ام ذياب: ها يابنيتي كيف القرءان معاكي قريتي زين عند الشيخه
البنت : ايه يمه وتقول الشيخ انا من البنات الجيدات
الأم : شوفي ايش في الصندوق
# تقوم البنت تفتح الصندوق وتلاقي الثوب وتلبسه وفرحت فيه
راحت لأمها وباست راسها وقالت الله يجزاكي الجنه ربي يحرمك عن النار ربي يطول بعمرك ويخليك لنا ذخر
وراحت عذبة توري البنات ثوبها
المشهد الرابع.
تمرض زوينه وتطيح على فراش المرض
بنتها ميثاء تبكي وندمانه وخايفه ان امها تتوفى وتقوول بنفسها:
يارب تشفيها وتقوم يالسلامة وارجع اهتم فيها وابر بها
ياحسرة الايام اللي مضت وانا مهملتها وهي جالسة عند امها وتحط الكمادات على جبينها
وتدعي ان الله يشفيها ويعافيها ويقومها بالسلامة
تجي ام ذياب تزورها
أم ذياب: السلام عليكم ياميثاء
ميثاء: وعليكم السلام
ام ذياب: لاباس عليها تقوم بالسلامة
ميثاء : تفضلي ياخالة
تدخل ام ذياب وتجلس عند زوينة تمسك بيدها عوافي ياختي اجر وعافيه وتحملي
المشهد الخامس
تقوم زوينه من مرضها
وتعتني فيها بنتها ميثاء وتجلس هي واياه على القهوه
ميثاء: تصدقين يمه يوم مرضتي اسودت الدنيا في وجهي وخفت عليكي وقعدت اتذكر الأيام اللي كنتي تحتاجي فيها لي وانا اروح ويا بنات الفريق
زوينه: ماعليه ياميثاء المهم انك اللحين عرفتي غلطتك وانتي ملزومة تبرين بأمك
ميثاء: ابشري يمه ماراح اتركك بعد اليوم
زوينة: ومو بس كذا عليك بحسن الاخلاق وبر بوالديك تكسبين رضى الله سبحانه ثم رضي والديك ..

قام بتمثيل الأدوار
رزان الدوسري .. أم ذياب
منيرة النقيثان.. وضحى
رفا الطويرش.. عذبة
ريا الوضاخي.. عزوه
اسما النقيثان.. زوينه
دجى الجمل.. ميثاء
امجاد الغزي.. غزلان

التدريب والمتابعة.. أمل الشايع..العنود محمد

شكر خاص لكل من ساهم في انجاح فعاليات اليوم الشعبي ..
انتظونا.. لنا عودة بإذن الله..

[عبدالله الزيدان]

شكرا لكم على هذه الجهود الطيبه ..

وفقكم الله ولا حرمكم ربي الأجر والمثوبة

[الخطوط]

مجهود تشكر عليه طالبات عماد المستقبل

[صفاء القلوب]

يعطيكن العافية يالحبيبات كما عهدناكم مبدعات بوركت جهودكن ... ومبدعة انتي يا شعووله الله بحعظك

[ابواصيل]

[الهايم]

ماشاء الله تبارك الله
أشكركم على جهودكم الجباره والرائعه
وأسأل الله تعالى ان لايحرم القائمين الأجر والمثوبة
جزاكم الله خيراً
لكم خالص تحياتي ودعواتي لكم بالتوفيق والسداد